Rèz pruvîncia

 

Rèz pruvîncia

                     

La pruvîncia ed Rèz l'é divîşa in dō pêrti óna in muntâgna e cl' êtra in pianûra. Al teritôri l'é tr'al Sècia a matèina ch' al sègna al cunfîn cun la pruvîncia ed Mòdna e l' Èinsa a sîra ch' al sègna al cunfîn cun la pruvîncia ed Pèrma e tr' al Po a mezanôt ch' al sègna al cunfîn cun la la pruvîncia ed Mântva in Lumbardéia e j Apenèin a mezdé che sègnen al cunfîn cun al pruvînci ed Lóca e Mâsa-Carēra in Tuscâna.

 

L'é traversêda da matèina a sîra da la Via Emélia, dal ferovéi F.S., da la ferovéia T.A,V. e da autostrêda dal Sōl A1 e da mezdé a mezanôt da la Strêda Statêla 63 che dal Pâs dal Cerêto la và fîn a Rèz e da Rèz fîn a Gualtêr cme Strêda Pruvincêla 63R.

 

L'é l' insèm ed 45 Cmûn; i cèinter pió impurtânt în: ind la bâsa Guastâla lòngh al Po, e al sitadèini ed Curèz e Nuvalêra. In pianûra Rèz pôst ed la Pruvîncia, Rubēra e Sant' Ilâri, a i pē ed la culèina Scandiân secònd cèinter pió impurtânt ed la pruvîncia, Casalgrând in culèina mèinter in muntâgna al cèinter pió impurtânt l'é Castelnōv di Mûnt.

 

La cunuméia ed la pruvîncia arşâna l'é pugêda só soquânt setōr principêl: l'agricultûra ch' la rapreşèinta 'n' impurtânt fûnt ed rèdit e che, cun al nuvitê tetnolôgichi 'd j ûltm ân, l'é fr' al pió réchi e şvilupêdi ed la regiòun, l'alevamèint dal bèsti cun còl di nimêl sèimper pió cuncentrê e in mân a i privê, la mecânica che sèimper di pió l' a 's câmbia e l' a 's vōlta vêrs produsiòun tetnologicamèint avansêdi, l'indóstria dal magnêr che cun al Grâna e al Lambrósch l'é óna dal prémi in câmp nasionêl, l'indóstria ed la cerâmica cun la produsiòun ind la zôna de Scandiân, Casalgrând e Castlarân, al tèsil cun óna dal j aşièndi pió cgnusûdi in câmp internasionêl e dimòndi coperatîvi che quâcen divêrs setōr dal magnêr, ai traspôrt a i servési. Per sti mutîv la pruvîncia l'é dimòndi şvilupêda, ânca in zôni scômdi cme in muntâgna dóve aşièndi céchi a 'gh la chêven a dêr da lavurêr a dimòndi persòuni. La dişocupasiòun praticamèint l' an gh'é mìa.

Nôta: al stèma ed la pruvîncia ed Rèz l' é stê tôt da www.araldicacivica.it e l'avtôr l'é Massimo Ghirardi.