La Sópa inglèişa

 

Col ch' a 'gh vōl:

 

5 bâli d' ōv

5 cucêr ed sócher

5 cucêr réch ed farèina

5 bicêr schêrs ed lât

1 bustèina ed vanélia

100 gr. ed ciculâta amêra

1 pâch ed savujêrd arşân

scôrsa ed limòun

alchêmer o un mést per dōls a piaşèir

 

Preparasiòun:

Sbatî al bâli d' ōv cun al sócher fê dvintêr s'ciumōş e quêşi biânch al miscóli. Vudê piân piân la farèina pó, sèimper piân, al lât; pó la vanélia. Mèinter al fê cōşer armes'cê cun un cucêr ed lègn  fîn a quând la crèma la 's infisés sèinsa bòjer. Préma tajê in dō pêrt, per la lònga, i savujêrd pó imbibî ind al liquōr e fudrê al stâmp. Vudê un strêt ed crèma zâla e quacêl cun chiêter savujêrd insupê. A la crèma ch' a v' é vansê zuntê la ciculâta amêra fâta andêr in pōlvra ind al meşnatót e vudêla ind al stâmp e finî cun 'n' êter fōder ed savujêrd.

La sópa acsé fâta la gnirà mésa ind al frigô. Préma ed servîrla a prî sprichêrla incòra cun al liquōr.

 

E... bòun aptît!